بسم الله الرحمن الرحيم
طبعا قبل أى حاجة لازم نقول بسم الله الرحمن الرحيم , لو قلنا كدة هنبدأ نحس فعلا ان الواحد مننا بدأ يتغير للحاجة الحلوة ,
بعد كدة ممكن نخش فى الموضوع :
أنا حبيت أكتب الموضوع دة كنوع من التعبير عن رأيى اللى ملهوش أى لزمة بالنسبة لأى حد . بس أهه, الواحد بيضحك على نفسة وبيحاول يقنع نفسة ان فى ناس ممكن تكون زيى كدة.الموضوع دة يا جماعة عن الطبيخ , مش الطبيخ كلة طبعا , نوع معين من الطبيخ . طبعا فى ناس هتقرأ الكلام دة وهيقولو اية الاهبل اللى كاتب الكلام دة , انا طبعا ولا هيهمنى انا عاوز أقول حاجة عن نفسى ومش مهم أعرف رأى حد فيا دلوقتى , لما اللى بيقرأ الموضوع يكمل قرآتة ممكن يغير رأية ويقول ان أنا كان عندى حق ولو مغيرش رأية بردة عادى مش مشكلة . المهم أن انا أكون قلت اللى فى نفسى . انا يا جماعة بجد زهقت من "الكوسة" ..... أة الكوسة . يعنى انا من كتر ما أكلت كوسة تعبت وخايف يحصلى حاجة أنا متأكد ان فى ناس كتير جدا زيى كدة بس بياكلوها غصب عنهم , هيعملوا اية بس , يا عينى غلابة . الكوسة دى بقى أنا أكلتها فى كل حتة رحتها. ............ متستغربش قوى كدة. انت كمان أكلتها زيى بالظبط . دا أنا ياما أكلت كوسة فى المواصلات,وفى الكلية , فى أى مؤسسة حكومية أنا رحتها , وفى أماكن كتير قوى . المهم أن أنا كرهت الكوسة بس للأسف أنا مجبر عليها ومش عارف أقول لأ ..... نفسى أحس ان بجد فى ناسى عندها نفس الأحساس اللى أنا حاسة لأنى فعلا زهقت ومش عارف أعيش بالكوسة دى . نفسى الحال يتغير .... فعلا ...." لنا الله"
أعتذار رسمى للكوسة" كخضروات" - فعلا الكوسة دى عانت معانا كتير يا جماعة .
